Петропавл қаласындағы «№ 1 арнайы мектеп-интернаты» КММ базасында өткен тәжірибелік семинардың мақсаты – дизайн және көркемдік модельдеу саласындағы мұғалімдердің кәсіби құзыреттілігін дамыту болды. 2024 жылдың 17 мамырында өткізілген бұл іс-шара, орта білім беру ұйымдарының бейнелеу өнері мен көркем еңбек пән мұғалімдеріне арналған болатын.
Семинардың тақырыбы «Оқушылардың әлеуметтік дағдылары мен эмоционалдық интеллектісін дамыту үшін керамика өнерін пайдалану» деп аталды. Бұл тақырып, оқушылардың шығармашылық қабілеттерін дамыту және олардың әлеуметтік дағдылары мен эмоционалдық интеллектісін жетілдіру үшін керамика өнерінің маңызын ашып берді.
Шеберлік сыныбында, көркем еңбек пәні мұғалімі Батай Серхан қонақтарға керамикалық бұйымдар жасаудың әртүрлі техникаларын көрсетті. Мұғалімдерге керамикалық пластика, қолмен модельдеу және пішіндеу сияқты әдістерді қолдану арқылы оқушылардың сенсорлық дағдыларын дамытуға болатындығын көрсетті. Сонымен қатар, керамикалық өнер арқылы оқушылардың шыдамдылығын, шығармашылық ойлауын және өзін-өзі бағалау қабілеттерін арттыруға болатындығы айтылды.
Семинар барысында мұғалімдер өздерінің кәсіби білімдерін жетілдіріп, оқушыларға арналған жаңа әдістемелерді меңгеруге мүмкіндік алды. Бұл іс-шара, оқушылардың өздерінің шығармашылық қабілеттерін дамытуға және әлеуметтік дағдылары мен эмоционалдық интеллектісін жетілдіруге ықпал ететін болады.
